الثلاثاء، 27 ديسمبر، 2011

اترك المستقبل حتى ياتي (من كتاب لا تحزن)


هذه مقتطفات اعجبتني من كتاب "لا تحزن" 

اترك المستقبل حتى ياتي

 لا تستبق الأحداث ، أتريد إجهاض الحمل قبل تمامه ، وقطف الثمرة قبل النضج 

 إن غدا مفقود لا حقيقة له ، ليس له وجود ، ولاطعم ، ولا لون ، فلماذا نشغل أنفسنا به    ونتوجس من مصائبه ، ونهتم لحوادثه ، نتوقع كوارثه 

ولا ندري هل يحال بيننا وبينه ، أو نلقاه ، فإذا هو سرور وحبور ، المهم أنه في عالم الغيب لم يصل إلى الأرض بعد
إن علينا أن لا نعبر جسرا حتى نأتيه ، ومن يدري لعلنا نقف قبل وصول الجسر ، أو لعل الجسر ينهار قبل وصولنا ، وربما وصلنا الجسر ومررنا عليه بسلام.

إن إعطاء الذهن مساحة أوسع للتفكير في المستقبل وفتح كتاب الغيب ثم الاكتواء بالمزعجات المتوقعة ممقوت شرعا ، لأنه طول أمل ، ومذموم عقلأ ، لأنه مصارعة للظل

إن كثيرا من هذا العالم يتوقع في مستقبله الجوع العري والمرض والفقر والمصائب ، وهذا كله من مقررات مدارس الشيطان { الشيطان يعدكم الفقر ويامركم باالفحشاء والله يعدكم مغفرة منه وفضلا }
كثير هم الذين يبكون ، لأنهم سوف يجوعون غدا ، وسوف يمرضون بعد سنة ، وسوف ينتهي العالم بعد مائة عام.
إن الذي عمره في يد غيره لا ينبغي له أن يراهن على العدم ، والذي لا يدري متى يموت لا يجوز له الاشتغال بشيء مفقود لا حقيقة له.اترك غدا حتى ياتيك ، لا تسأل عن أخباره ، لا تنتظر زحوفه ، لأنك مشغول باليوم.

  


السبت، 10 سبتمبر، 2011

A.C.A.B لماذا


A.C.A.B >>> All Cops Are Bastards  
كتير من الناس ميعرفوش الجمله دي و مشفوهاش الا بعد احداث مباراة الاهلي و كيما و بدأت تنتشر بقوه على تويتر و فيسبوك

بخبرتي الطويله في مدرجات و استادات مصر و عشان انا بحضر المباريات من و انا عندي 7 سنين يعني الاستاد تقريبا تاني اكتر مكان قضيت فيه وقتي فأنا مقتنع تماما بالمقوله دي
مفيش بوليس في الدنيا بيستخدم سلاح الخياله مع جمهور كره غير في مصر .... مع كل ماتش تلاقي متاريس و خيول و سلاح عند دخولك الملعب ... لما تكون رب اسره معاك عيالك واخدهم تتفرج على فريقك اللي بيجي مره كل سنه يقولك لازم تيجي قبل الماتش ب 5 ساعات تلاقي الخيول و العساكر في انتظارك ...( مع العلم ان اللي راكب الحصان ميفرقش عنه كتير في مستوى الذكاء) و يجي الباشا اللي قاعد ع الكرسي بيشرب السيجاره و قافل الباب مش عايز يدخل حد  و يقول للعسكري فضيلي المكان ده فيطلع يجري عليك بالحصان يدوس اللي يدوسه و يجري اللي يجري

عديت مرحلة الحصان ادخل بقى في مرحلة "صف واحد جنب الحيطه يا ولاد الوسخه" " مسمعش صوت واحد" "تذكرتك قبلك ياد انت و هو" و طبعا كل ده  بتنفيذ امين الشرطه المبجل و تحت اشراف الباشا

لو كنت سعيد الحظ و الباشا لقاك مؤدب ووصلت لباب المدرج تعالى للتفتيش مش حقولك اني قلعت الجزمه قبل كده و لا الراجل قالي اقلع البنطلون ولا الشتيمه اللي بتتقال لكن الاهم من ده كله ان ممنوع تاخد اكل ممنوع مياه ممنوع عصاية العلم ممنوع ... ممنوع .... ممنوع  و طبعا هو مش بيقولك لو سمحت ممنوع هو بيشد الحاجه منك او بتتمسك من قفاك و يقولك يا ترميه و تدخل يا يلا امشي من هنا !!!!!!

كل الكلام ده في التسعينيات و بداية الالفيه الجديده يعني قبل ظهور الاولتراس في مصر و مع ظهور جماعات روابط التشجيع "اهلي فنز كلوب " و " زمالك لوفرز يونيون " حاولنا ادخال العقليه الجديده و المنظمه في مدرجاتنا و لكن يبدو انها لم تعجب ظباطنا ان يكون هناك قوه منظمه داخل المدرجات تهدد عرش الباشا و رغم الامتناع عن الهتافات المعاديه و الشتيمه استمر التعنت الامني فكان لا بد من الانتقال الى "عقلية الالتراس" و البحث عن الحريه

من دون التطرق الى ما عاناه الالتراس و حتى لا نتهم الالتراس انهم من ادخلو الكراهيه و معاداة الناس للشرطه اعتقد ان ما ذكرته يؤكد ان النظرية و اننا لم نكن الجناه يوم  ما

مع دخول مرحله جديده مع شباب يرفض ان يهان و ان يسب امه او ابيه كان لابد من تعامل اخر من الجهات الامنيه فبدأت حملات احمد شوبير عضو الحزب الوطني و صديق ابناء المخلوع (حتى لا ننسى) ضد الاولتراس و تلفيق التهم الواحده تلو الاخرى فهذا اتهام بال شذوذ و بالكفر و مره اخري بالانحراف  و تهديد امن البلد

حتى اصبح هناك معتقد راسخ ان فرد الالترا هو كائن فضائي او شبح بينزل يضرب و يموت و يختفي فجأه

نعم حدث بعض التجاوزات في بعض الاوقات و تم الاعتراف بها من قيادات المجموعات و لكن لا يمكن ان يذبح شباب كان من نواة الثوره و مثال في الشجاعه

عرفتو بقى ليه ؟؟

A.C.A.B

ملحوظه : هذا الشاب موجه له تهمة اتلاف ممتلكات عامه في شارع صلاح سالم


http://www.youtube.com/watch?v=Dkwb4FN6u_g&feature=related

الثلاثاء، 5 يوليو، 2011

ما اشبه اليوم بالبارحه ب 1400 سنه

لو كنت مسلم او غير مسلم اقرا و اعرف و خدها كأنها قصه من قصص الثوار و اهو ممكن تقتنع او تلاقي حاجه تفيدك بلاش تفكر ان اللي عمل الاتي ده رسول الاسلام عشان الكلام باسم الاسلام بيزعل الناس

حنعتبر نزول الاسلام كان ثوره و محمد هو قائدها  بداية من البعثه مرورا بالهجرة وصولا لفتح مكه
كيف بدأت من شخص واحد فأصبح يؤمن بها الملايين
 في اكتر من نقطه اعتقد ممكن تفيدنا و تدعونا للاستمرار في ثورتنا
1-من منطلق ان الفساد العقلي بياخد وقت طويل عشان يتعالج , لزم الرسول 13 سنه عشان بس يعرف الناس معنى الشاهدتين "لا اله الا الله محمد رسول الله" و يبدل ما في قلوبهم و عقولهم و تتركز و تثبت هذه الكلمات البسيطه مكان الفساد , فكيف لنا و نحن البشر العاديين ان نبدل الفساد المتركز في مجتمعنا و انتشر في كل الفئات مش في الرؤوس فقط  ؟!! محتاجين وقت يا بشر ماهو مفيش زرار ندوس عليه نغير الناس ..... فصبرا على الشعب و اياك تقول ده شعب خساره فيه و عمره ما حينضف لأن الشعب تشبع بالفساد العقلي في جميع نواحي الحياه بفعل فاعل
ولا ننسى ان اول كلمات نزلت لازالة الفساد العقلي  كانت "اقرأ"  فقد امر الله رسوله ان يقرأ اولا و يتعلم قبل ان يعلم  الناس

2- لما دخل الرسول المدينه و بعد تنظيف العقول و تثبيت القلوب بدأ يبني دوله على اساس المواطنه لأن فيها المسلم و الكفار بجميع انواعهم و المنافقين
أول اساس كان المسجد .. بغض النظر عن هو ايه لكنه مكان علاقة الانسان بأعلى , علاقة الانسان بنفسه , العلاقه السريه التي لا يعلمها احد,  اعلاء للاّ يه "ان الله لا يغير ما بقوم حتى يغيرو ما بأنفسهم"  , الفرد و دوره في الدوله , الفرد و اهميته تبدأ من علاقته بنفسه  ......من الاخر و بمفهومنا الثوري الحديث لازم تتغير عشان تعرف تغير  
تاني حاجه كان علاقة افراد الدوله ببعضهم  بعض , كيف تكون قوي داخليا لتبدأ العلاقات الخارجيه
فهو ده التسلسل الطبيعي الفرد الصالح , المجتمع المتماسك فالدوله القويه خارجيا
يعني مينفعش ان رئيس وزراء مصر يسيب الدنيا بايظه جوه و الناس بتاكل بعض و يطلع يعمل جوله للدول الصديقه , اذا انقلبت الايه مش حتتعدل , لازم البدابه من الفرد ثم المجتمع الداخلي و ده طبعا بعد الوقت الطويل اللازم لتنظيف الفساد العقلي
3- و الاهم يوم فتح مكه ... يوم الحساب ....  المحاكمات الفاشله اللي بتتعمل اليومين دول
للناس اللي بتقول احنا نعفى عنهم ما الرسول عفا عن الكفار , هنا لنا وقفه
الرسول عفا عن اللي اهانه في شخصه , كان يقدر ان يحاسبهم و هنا يكون العفو عند المقدره , كان هو صاحب المسأله لكن من اهان الله و الدعوه فقد امر الرسول بقتلهم و لو كانو معلقين بأستار الكعبه
هنا اصحاب المسأله  اهل الشهداء اصلا لا يقدرون عشان يعفي او ميعفيش , ده غير انهم اصلا مش حيسامحو في دماء اولادهم  , لا انا ولا انت ولا اي حد يقرر نعفو او لا , فقط اهل الشهداء هم اصحاب القرار
و لن يكون لهم القرار في ظل هذه الاوضاع
لازم الشعب كله يلتف لتمكين اهالي الشهداء من اتخاذ القرار عايز تعفو ولا عايز القصاص
انا نازل يوم 8 لتمكين اهالي الشهداء من اتخاذ قرارهم   فأنه ان غابت العداله ضاعت البلاد و بيت الظالم يخرب قبل بيت الكافر
خلاصة الكلام انا لا نازل في سبيل حريه و لا ديموقراطيه و لا دينيه و لا ليبراليه و لا مرجعيه و لا اي مسمى سياسي او اجتماعي  او ديني
انا نازل من اجل العدل ..... فقط العدل  ما يقيم الدول و غيابه يهدمها

الثلاثاء، 28 يونيو، 2011

انا مصري .... انا اركب الموجه

-الو ايه يا مان , ايه الكلام النهارده
- حبيبي , ليك عندي بأه حتة نزوله النهارده , حننزل نلم الزباله
- بيييس اشوفك في سيلنترو المكتبه و نلم هناك بس متنساش تجيب الكاميرا البروفيشونال و البنات كلهم هناك كمان
- اشطه انا اصلا زهقت من المظاهرات و عايز اغير
  و يلبس الكابتن الجلوفس (الجوانتي قبل الثوره) و يقف مع ميمي و سوسو و لولو و عباس يلمو الزباله (اكياس لبان) من قدام مكتبة اسكندريه اللي عمرنا اصلا ما شفنا قدامها كيس ع الارض , و بعد ساعه و ربع متعبه مووت يقعد ع الرصيف و يتنهد تنهيده طويله تدل على الشقاء و يقول لميمي حنعمل ايه بالليل
ميمي : لا انا في اللجنه الشعبيه سهران طول الليل , بنزل بال بي اس بي اهو يسليني
-اشطه انا كمان نازل مع الرجاله في اللجنه , عارف احلى حاجه في الثوره اننا مش بنروح الكليه انا لو اعرف كده كنت نزلت من يوم 25

بعد يومين .....
-ماااان النهارده في مسار اجباري** في قهوة ابو رجب و بكره كايروكي في الشارع وبلك تيما الاسبوع الجي في الشلالات
- طب و اللجنه و التنضيف ؟؟؟
-يا عم فكك انا زهقت بأه خلينا نفرفش و بعدين الفن ليه دور كبير في الثوره

 بعد فتره ..........
-حبيبي و ليك عندي يوم بأه جامد موووووت في شم النسيم حنطلع العجمي و البحر و هاوس بارتي يا مااان
-يا عم طب الحفله اللي جبنا تذاكرها
- يابني احنا حنفضل في اغاني الثوره و الخنقه ولا ايه انا جبت اخرييي

بعد برهه من الزمن ........................
شفت السلفيين عايزين يعملو ايه
مية نار و قطع ودان و ...,.,,,,و...........
اوو لازم مظاهرات لازم منسكتش هم اصلا مش معانا في الثوره

و تختفي هوجة السلفيين و الفتنه و الكلام ده

ماتش الاهلي و الزماااالك
لازم كله يروح و كله بقى التراس و مولود بشمروخ و بينام في الاستاد و ابو تريكه ابوه و شيكابالا جوز عمتو

هوبا الامتحانت خلصت , هوبا العجمي و مارينا و حفلات و خمر و نساء و اهو رمضان داخل و نتوب فيه

ايه ده اول اغسطس اهو مع اول رمضان هو جه بسرعه كده ليه
سبحان  الله و بقدرة قادر بقت الجلابيه و السبحه هم الزي الرسمي للشعب مع ان السلفيين الوحشين المتشددين بيلبسوها !! طب نسيت الاهلي الل يكان في دمك و الثوره اللي انت عايش عليها و النظافه و خدمة المجتمع و الجامع هو بيتك خلاص و لا شغله ولا مشغله
يا سيدي ده هو شهر في السنه لازم نديه حقه
و اهم حاجه الوقفه بارتي م خلاص بأه الشهر خلص .......................................


المشكله هنا ان المستقبل غامض فمش عارف اكمل السنه حتمشي ازاي و الباشا الكابتن خطته ايه لبعد رمضان

هل فعلا الموجه و ركوبها برضو مم خلفه النظام السابق في الشعب
هل التخبط وصل بنا لهذه المرحله !!
في كل موجه من امواج العام لو سألت هذا الشخص عن رأيه في البلد و او مرشح رئاسه او حزب مفضل اكاد اجزم ان الاجابه ستختلف في كل مره
المشكله هى مش الكوره ولا الثوره ولا التنظيف و رمضان و الصيف , انا فقط رأيت في هذا المثال حياة المواطن المصري (ده الطبقه اللي عندها حياه يعني مش بتكلم ع العايش ميت) فاذا كنا نحن من نمتلك جزء من الحياه بهذا التخبط و العشوائيه فماذا تنتظر ممن لا هم له سوى لقمة العيش عشان ميموتش من الجوع

اخي في الله و الوطن من نلت جزء من الحياه , لا يمكن ان نلوم الذي فقد حقه في المعيشه و نتهمه بالجهل و نحن احق بهذا الاتهام

من الاخر انا مش عارف العيب فيا ولا في النظام و لا العيشه لأني زي باقي الناس انسان متخبط راكب للموجه  فأنا مصري .... أنا اركب الموجه